CEBU, Philippines - Naglumpayat sa kahinangop ang mga Clean and Green ug Job Order nga kawani sa kagamhanan sa dakbayan sa Mandaue dihang giaprubahan sa konseho ang resolusyon nga gipangamahanan ni Konsehal Emiliano Rosal nga maoy chairman sa committee on budget and appropriations sa pagpagawas og gahin nga salapi alang sa ilang cash incentive.
Gidugangan pa ang ilang paglumpayat sa kahinangop dihang gipahibalo usab ni Mayor Jonas Cortes nga ang ilang cash incentive madawat na sa maong mga kawani sa labing madali nga panahon sa dili pa ang Pasko.
Ang tanang sakop sa Konseho nagka-uyon dayon paghatag og katungod kang Cortes nga mahatagan og cash incentives ang tanang kawani sa dakbayan ug kini naglakip sa mga sakop Clean and Green ug Job Orders nga mga kawani.
Sa iyang resolusyon ni Rosal nga ang makadawat niini mao kadtong nakatrabaho na og unom ka bulan o sobra pa gikan sa Enero hangtud sa Oktubre 31 ning tuiga nga mga CG ug JO pinaagi sa gipasar nga Supplemental Budget No. 1.
Ang madawat nga cash incentives nagkantidad og usa ka bulang suhulan. Hasta ang mga kawaning mao pay pagsulod sa trabaho sugod Oktubre 31 apil usab sa makadawat, apan di parehas sa madawat sa mga karaang kawani. - BANAT NEWS