CEBU, Philippines - Gitulis ug pagkahuman gipatay ang usa ka mag-uuma sulod sa iyang gipuy-ang payag sa bukirang bahin sa sitio Malarid barangay Nug-as lungsod sa Alcoy niadtong Biyernes sa 1:15 sa hapon. Ang biktima kansang patay'ng lawas napalgan nga naputos og tinigbasan ug dinunggaban giilang si Alberto Dechosa Getutua, 59, molupyo sa nahisgutang lugar ug pagpanguma ang trabaho.
Subay sa imbestigasyon sa kapulisan sa Alcoy pinangulohan nila ni PO3 Agustin Romanos ug PO3 Emilio Carunggay ang biktima nagbuy-od nalang nga wala nay kinabuhi nga naglunang sa kaugalingong dugo sulod sa payag niini dihang nadiskubrehan.
Sumala pa sa kapulisan nga posibleng misukol ang biktima sa mga gikatahapan hinungdan nga gipatay kini, kini base usab sa nangabungkag nang mga butang sa biktima diha sa sulod sa payag.
Nakuha diha sa crime scene ang kutsilyong dunay gitas-ong 10 ka pulgadang maoy gituohang gigamit sa mga tulisan ug ang pitaka sa biktima nga wala nay sulod nga kwarta ingon man ang bag nga pulos nagkadugo.
Ang kapulisan padayon pa sa ilang imbestigasyon pagtumbok sa mga responsable sa krimen. - BANAT NEWS