CEBU, Philippines - Gilusad sa Mandaue City Police Office (MCPO) ug Lapulapu City Police Office (LCPO) ang Santa Cop isip pagpakita nila sa mga molupyo sa nahisgutang mga lugar nga kahiusa sila sa kasaulogan sa Pasko.
Si Chief Superintendent Lani-O Neres nga maoy Regional Director sa Police Regional Office (PRO) 7 mitambong usab sa paglusad niini sa miaging adlaw.
Sa maong kalihokan, nanghatag sila og mga duwaan ug pagkaon sa mga pinili nga mga street children nga gipadala sa City Social Welfare and Development (CSWD) isip pagpatagamtam usab kanila sa diwa sa Pasko.
Si Superintendent Clifford Gairanod sa LCPO, operation section nga nahinabi sa Banat News miingon nga isip kabahin sa ilang pagpakighiusa sa pagsaulog sa Pasko, silang mga polis nagsul-ob usab og kawo ni Santa Claus.
Si Inspector Miann Florenosos sa women’s desk sa (MCPO) nga nahinabi sa Banat News miingon nga 50 ka mga street children sa CSWD ang ilang gihatan og pagkaon, mga duwaan ug mga kagamitan nga naglakip sa mga tsinilas ug uban pa. Dugang pa niya nga laing mga bata gikan sa Children for Joy Foundation nga nagbase gihapon sa maong dakbayan ang lakip usab sa ilang gihatagan og pagkaon ug mga pinaskohan.