CEBU, Philippines - Gipusil patay ang usa ka 19-anyos nga batan-ong lalaki samtang mitambong og disco atol sa gipahigayong Christmas party sa Masaba National High School sa barangay Masaba siyudad sa Danao niadtong Huwebes sa alas 9 sa gabii.
Ang biktima mao si Jorel Capuyan Perez, 19, molupyo sa nahisgutang lugar samtang ang suspek wala pa mailhi sa kapulisan sa paghimo ning balita.
Matud ni SPO4 Edgar Gomez sa Danao City police dihang nahinabi sa Banat News dunay gipahigayong party ang mga tinun-an ug giapilan kini og disko diha sa ilang tunghaan ug ang biktima lakip sa mitambong.
Apan usa sa mga barkada niini ang gikatahong nakakita og away sa laing grupo hinungdan nga giuwang kini sa biktima aron dili mosangko sa kagubot apan wala kini makabantay sa usa sa mga gikaaway sa higala nga nagdala kini og armas ug diretso sa pagpusil kaniya sa bugan.
Ang biktima gidali pagdala sa Danao City District Hospital apan tungod sa katalandugon sa kahimtang niini gilahos kini sa Vicente Sotto Memorial Medical Center (VSMMC) apan gideklarar nga dead on arrival.
Samtang ang mamumuno abtik kaayong nakasibat dungan sa nagdinaganay'ng mga tinun-an ug wala na maabti sa mirespondeng mga polis, wala usab matino kun duna bay gikuhang security ang tagdumala sa maong tunghaan alang sa maong kalihukan.
Ang kapulisan padayun pa sa ilang imbestigasyon pagtumbok sa mamumuno. - BANAT NEWS