CEBU, Philippines - Duha ang naangol sa nahitabong pagpangrakrak sa usa ka restaurant sa tulo ka armadong mga lalaking nagsakay og pribadong sakyanan nga Kia, Sorrento sa miaging kaadlawon.
Ang biktima mao sila si Nieves Lumapas Rosas, 20, taga dalan Catalino U. Ouano sa barangay Looc, dakbayan sa Mandaue ug Hilario Judal Silare, 28, nga guwardiya sa VECO sa Wireless, Subangdaku sa nahisgotang dakbayan.
Si PO3 Rowena Serrato sa kapolisan sa Presinto 2 sa Subangdaku Police Station nga nahinabi sa Banat News miingon nga didto sa sulod sa Balay Kainan Restaurant sa dalan Ouano Avenue sa barangay Subangdaku ang mga biktima.
Si Nieves naigo sa iyang tangkugo ug sa tuhod samtang si Silare naigo sa iyang tuhod ug uban pang bahin sa iyang kalawasan.
Si PO3 Serrato miingon nga human sa maong pagpamusil ang wala hiilhing mga lalaki dali usab nga nakapahilayo paingon sa dakbayan sa Sugbo.
Duha ka mga testigos mihulagway nga pulos batan-on ang tulo ka mga lalaking namusil. Nakuha sa crime scene ang basiyo sa wala pa matinong kalibre sa armas samtang ang mga biktima gidala sa tambalanan. Atol ning pagsuwat sa balita wala pay klarong impormasyon ang kapolisan sa motibo sa pagpamusil. Romeo Limpangog