CEBU, Philippines - Daghang mga kawani sa Bureau of Customs (BOC) Port of Cebu ang nasagmuyo nga girelibohan sa katungdanan si Cebu Customs District Collector Ricardo Belmonte nga matud pa naggumikan sa politika.
Ang hingpit nga pagbiya ni Belmonte gikan sa Port of Cebu gihimo pinaagi sa usa ka turn –over ceremony niadtong Martes diin opisyal niyang gitakli ang maong katungdanan ngadto sa bag-ong kolektor nga ihulip kaniya nga si Ronnie Silvestre nga gikan sa BOC Davao.
Base sa nakuhang impormasyon sa Banat News, si Belmonte nag-inusara nga naapektuhan sa lahugay sa BOC bisan sa maayo nga performance niini human makuha ang target collection matag tuig sukad nadestino kini sa Sugbo niadtong tuig 2005.
Ang Customs Personnel Order nga nadawat sa Banat News nagkanayon nga si Belmonte ibalhin sa Office of the Commissioner, apan giisip kini nga floating status.
Tungod sa paghulip kang Belmonte, ang mga opisyal sa BOC-Cebu mipadayag sa ilang kasagmuyo sa hukom nila ni Customs Commissioner Napoleon Morales ug Finance Secretary Margarito Teves gumikan sa maayong performance ni Belmonte.
Matud sa mga opisyal nga politika ang hinungdan sa maong kinalit nga paghulip kang Belmonte gumikan kay ang iyang igsuon nga si Mayor Sonny Belmonte sa Quezon City mitapon sa partido Liberal nga nagduso kang Sen. Benigno "Noynoy" Aquino III pagka-presidente ug Manuel “Mar” Roxas sa pagka-bise presidente sa nasud. Gidudahan usab sa mga opisyal sa BOC-Cebu nga ang administrasyong Arroyo maoy nagpahulip kang Belmonte hinungdan nga napugos lamang si Morales ug Teves pagpatuman sa lahugay nga si Belmonte lamang ang apektado.
Nasayran sa Banat News nga niadto pang Nobiyembre 16, ning tuiga nakuha sa BOC-Cebu ang target collection sa 2009 nga mobalor og P5.6 bilyones.
Sa miaging tuig, ang koleksiyon sa BOC-Cebu gikan sa buhis sa mga imported nga kargamento milapas og P296.124 milyones sa P5 bilyones nga target, samtang hangtod Disyembre 7, nakakolekta na usab kini og P6,019.412 bilyones kun surplus nga P356.412 milyones sa P5.663 bilyones nga target sa 2009.
Si Belmonte nga nahinabi sa Banat News nagkanayon nga sama sa usa ka maayong sundalo, mosunod siya sa kamanduan sa iyang labaw ug andam manaog sa katungdanan aron ihatag sa bag-ong collector. Nanghinaut si Belmonte ngadto sa mga kawani sa BOC-Cebu nga susamang suporta kaniya ang ilang ihatag ngadto ni Silvestre. - Bong Soriano (BANAT NEWS)