CEBU, Philippines - Gideklarar nga “No Smoking Area” ang dalan sa barangay Babag, dakbayan sa Lapulapu nga nagpaingon sa lungsod sa Cordova diin nahimutang ang mga pabrika ug mga tindahan sa nagkadaiyang matang sa paboto.
Si Operation Chief Superintendent Clifford Gairanod sa Lapulapu Police Office (LLP0) nga nahinabi sa Banat News miingon nga ang pagdeklarar nga no smoking area ang maong dalan ilang gihimo aron kalikayan ang mga aksidente nga naglambigit sa pag-ulbo sa paboto.
Lakip nga gidili sa maong lugar ang pagbaligya og sigarilyo ug pagdagkot og pusporo, lighter ug uban pang matang nga makamugna og kayo nga maoy makaingon sa aksidente.
Si Superintendent Gairanod miingon nga padayon usab nilang gi-monitor ang mga tindahan nga nagladlad sa nagkadaiyang matang sa paboto sa maong lugar.
Naglakip sa ilang gi-monitor mao ang pagsuta kun may mga karatola ba kini sa pagpahibawo nga ang maong lugar usa ka “no smoking area,” pagpakita sa ilang business permit, fire safety clearance certificate ug uban pa nga mga rekisito alang sa ilang pagpamaligya og paboto.
Kahinumdoman nga si Chief Superintendent Lani O-Nerez misusi sa maong mga pabrika sa barangay Babag sa miaging semana sa pagsuta kon hingpit ba nga nakatuman ang mga tag-iya niini kalabot sa mga lagda nga gitumong sa kasiguroan ug kalikayan ang aksidente sa paboto sa panahon sa pagsaulog sa Pasko ug Bag-ong Tuig. - Romeo T. Limpangog (BANAT NEWS)