CEBU, Philippines - Dunay kapin sa 100 ka mga tawo nga nalambigit sa pagpayuhot og ilegal nga drugas nalakip sa watchlist ug gipanid-an na sa kapolisan sa lalawigan sa Sugbo.
Gipahibalo ni Supt. Rodulfo Albotra, hepe sa Provincial Intelligence Branch (PIB) nga ang habagatang bahin sa lalawigan sa Sugbo grabeng gihugpaan sa mga tigpayuhot og ginadiling drugas ikomparar sa amihanang bahin.
Apan ang problema sa ilegal nga drugas sa probinsya dili kini alarming, matud niya.
Gipasabot niini nga ang habagatan maoy mas daghang ilegal nga drugas ikomparar sa amihanang bahin kini tungod kay mas accessible kini sa mga sakyanan gikan dinhi sa dakbayan sa Sugbo.
Gawas pa niini, sa habagatang bahin sa probinsiya sa Sugbo adunay mga dagkong dakbayan hinungdan nga daghang mga nalambigit sa pagpayuhot sa ilegal nga drugas sa nahisgutang mga lugar.Apan sa ilang evaluation sa maong mga tigpamaligya’g drugas, aduna usab sila'y mga “target list” ingon man “priority list” aron tamdan sa anti-illegal drugs operations sa kapolisan.
Sumala pa niini nga adunay mga tawong nabutang sa watchlist apan ang uban wala gyud makonpirmar nga tigpayuhot samtang ang uban tiggamitan lang.
Karong nagsingabot nga Pasko, gipaabot sa kapolisan nga mosaka gyud ang suplay sa drugas sa probinsya hinungdan nga ilang gipahugtan ang kampanya niini. – BANAT NEWS