CEBU, Philippines - Pasakaan og kasong Usurpation of Official function ang usa ka lalaking nagpailang sakop sa Philippine Drug Enforcement Agency human madakpi sa usa ka operasyon sa ilegal nga drugas sa barangay Agus dakbayan sa Lapulapu sa milabay’ng gabii.
Matud pa ni Jessie Tabanao, ang tigpamaba sa PDEA 7 nga wala sa ilang listahan sa mga operatiba ug sa mga informers ang pangalang Rotelo Pelarion alyas Eddie nga residente sa Agus dakbayan sa Lapulapu.
Si Tabanao nagkanayon aron dili maduhig ang ngalan sa ilang ahensiya (PDEA) nga gamiton sa usa ka tawo sa ilegal nga kalihukan sila mismo ang mopasaka og kaso batok ni Pelarion.
Si Pelarion buot untang mobabag sa operasyon sa kapolisan sa dakbayan sa Lapulapu sa milabay’ng hapon human ang higala niining si Salvador “Buddy”Aquisalas gidakop sulod sa iyang sakyanan nga nahupot og kalibre .357 revolver lakip na ang duha ka paketeng gituhuang shabu.
Gumikan kay wala makapakita og legal nga dokumento si Aquisalas sa iyang paghupot sa maong armas hinungdan nga gisikop kini sa kapolisan.
Apan miinterbiner si Pelarion ug nagpailang sakop sa PDEA-7 apan gumikan kay walay gipakitang kamatuoran giapil kini sa pagsikop ug dihang girekisa nakuhaan sad kini og tulo ka gagmay’ng pakete sa ilegal nga drugas. (BANATNEWS)