CEBU, Philippines - Usa ka kandidato sa pagkamayor sa Tuburan ang misaulog sa iyang adlaw’ng natawhan pinaagi sa pagpang-apod og mga bugas ug de-lata sa iyang lungsod.
Si Aljun Diamante nga naa sa oposisyon sa Tuburan nagkanayon nga inay nga mogastos og bonggang kombira niadtong Nobiyembre 30 iyaha nalang ipang-apod sa mga kabus ang mapalit sa maong salapi.
Si Diamante mipapalit og kapin 100 ka sakong bugas ug kinahong mga de-lata ug pagkaon ug maoy gipanghatag.
Matud pa ni Diamante iyang gibati ang kahimtang sa iyang mga kababayan nga naglisod niining panahona gumikan sa kalisod ilabi na nga kulang ang mga kinitaan niini sa ilang abot sa pang-uma sa kabukiran.
Si Diamante miingon nga susama sa kinabag-an sa iyang lungsod nagagikan usab siya sa kabus nga pamilya sa bukid ug karong nakatagamtam siya og gamay’ng asenso buot lang niyang matabangan ang mga kababayan.
Naatol usab ang adlaw’ng natawhan ni Diamante nga bisperas sa katapusang filing of certificates of candidacy ug nianang pagkagabii na sa Disyembre 1 siya nakadesider nga mokandidato hinungdan nga kini gikuyogan sa liboang suporter nga nagdala og sulo. (Bong Soriano) (BANATNEWS)