CEBU, Philippines - Patay nang nadala sa tambalanan ang usa ka negosyante human kini gipusil sa duha ka wala mailhing lalaking nangaon sulod sa iyang karenderya sa barangay Parian kagahapon sa buntag.
Giila ang namatay mao si Rowen Yap, 36, tag-iya sa WINS Food chain ug molupyo sa Guadalajara sa barangay Guadalupe human makaangkon og samad pinusilan sa iyang ulo.
Nasayran nga duha ka wala mailhing mamumuno nangaon pa diha sa kan-anan sa biktima ug mibayad pa sa ilang gikaon, apan human madawat ang sukli sa ilang gibayad gikan sa inahan sa biktima nga si Winena gidiretso og pusil sa mga gikatahapan si Yap.
Sumala pa sa mga nakasaksi, ang duha ka wala mailhing mamumuno usa kanila ang nabantayang nagsul-ob og t-shirt sa usa sa mga dagkong unibersidad dinhi sa dakbayan nga gisapawan og itom nga jacket ug nagsuot usab og bullcap.
Human sa pagpamusil daling nanakay ang duha sa motorsiklong Honda XRM nga ilang gi-parked diha sa gawas.
Usa ka lalaking nahinabi sa Banat News nga nagbarog-barog diha sa gawas dihang nahitabo ang pagpamusil, mao ra usab ang paghulagway niini sa mga mamumuno.
Ang biktima dali usab nga gidala sa Chong Hua Hospital apan gideklarar sa mga doktor nga dead on arrival.
Sa pakighinabi sa kapolisan sa inahan sa biktima nga si Winena nagkanayon nga naglibog pa kini kun unsay motibo sa pagpatay sa iyang anak.
Sa pakighinabi sa Banat News ni SPO3 Rey Cuyos sa Homicide Section nagkanayon nga dili sila dayon makaingon nga estudyante ang mga gikatahapan tungod lang sa gisul-ob. - Lesley Caminade (BANAT NEWS)