CEBU, Philippines - Nawad-an og puhonan ang usa ka lab-asiro og isda dihang gitulis kini didto sa barangay Poblacion, lungsod sa Cordova sa miaging gabii.
Si SPO1 Llovero Agusto sa kapolisan sa maong lungsod miila sa biktima nga mao si Bernaldo Amistad, 30, minyo, nga taga Poblacion, Cordova.
Ang biktima kinsa nagtibi nga misumbong sa kapolisan nagkanayon nga naglakaw siya paingon sa karsada gikan sa ilang balay aron mag-atang og sakyanang pasaheroan paingon sa Pasil, dakbayan sa Sugbo kay mangompra og isda.
Apan samtang nagsubay siya sa ngiob nga dalan, kalit lang gisugat siya sa usa ka wala hiilhing armadong tawo ug gitionan sa armas de fuego niini uban sa pagpahibawo nga tulis.
Sa kabalaka nga patyon siya, iya nalang gihatag ngadto sa tulisan ang iyang igpapalit og isda nga balor og P4,500 .
Nahuwasan ang biktima sa kakuyaw dihang gibiyaan siya sa tulisan nga wala hilabti, apan nasubo kay wala na siya’y puhonan sa negosyo.
Padayon pang gipangita sa kapolisan ang maong tulisan. - Romeo T. Limpangog (BANAT NEWS)