CEBU, Philippines - Talandugon ang kahimtang sa usa ka mananapas og tubo dihang gitigbas kini sa usa ka tawong nalisoan sa maayong pangisip didto sa barangay Managase, lungsod sa Tabogon, lalawigan sa Sugbo sa miaging adlaw.
Ang biktima nailhan nga si Rommel Monteron, 18, ulitawo,nga taga Managase, samtang ang suspetsado nailhan usab nga si Marcelino Pino, hingkod nga silingan sa biktima.Sa report sa Tabogon Police Station ngadto sa Operations Branch sa Cebu Provincial Police Office (CPPO) kini nagbutyag nga nagpaingon na ang biktima sa iyang trabaho sa pagpanapas og tubo.Apan samtang naglakaw siya sa dalan giatangan siya sa suspetsado ug walay tingog-tingog nga mihabas kaniya sa dala niining matsete, ang gamitunon sa pagpanapas og tubo.
Hinuon nasamdan usab sa walang bitiis ang suspetsado dihang gipikhan kini sa laing mananapas og tubo nga wala hiilhi kinsa misuporta sa biktima.
Nadakpan usab dayon sa kapolisan ang suspetsado ug gibalhog na karon sa prisohan sa lungsod sa Tabogon. - Guam Logrono (BANAT NEWS)