CEBU, Philippines - Dunay pito ka mga lungsod sa lalawigan sa Sugbo ang gitakdang ipaubos sa “hotly contested area” atol sa nagsingabot nga eleksiyon sa Mayo, 2010.
Ang hepe sa Cebu Police Provincial Office (CPPO) Sr. Supt. Jesus Gaquing mibutyag sa dihang nahinabi sa Banat News nga ang pito ka mga lungsod gikonsiderar nga hotly contested area mao ang lungsod sa Daanbantayan, Madridejos ug Bogo sa amihanang bahin ug ang mga lungsod sa Dumanjug, Ronda, Tuburan ug Alegria sa habagatang bahin.
Gipasabot ni Gaquing nga ang pagkonsiderar nila nga hotly contested area sa usa ka lugar gibase nila sa mga nanghitabo sa nanglabay’ng eleksyon ning maong mga lugar ingon man usab ang lungsod sa Ronda ug Dumanjug nga dunay naglihok sa maong mga lugar nga organized crime group.
Gitakdang iduso ni Gaquing ang maong rekomendasyon sa Police Regional Office (PRO-7) aron ang Regional Intelligence Division (RID-7) maoy mo-evaluate ug moduso niini sa Commission on Elections aron ibutang sa watchlist.
Gipaabot niya nga init ang bugnong lugaynon ning maong mga lungsod sama sa Bogo diin mag-atbang si incumbent Mayor Celestino Martinez Jr. batok sa magpapatigayong si Mariquita Salimbangon-Yeung, igsuon ni Kongresista Benhur Salimbangon sa ika-upat nga distrito, samtang sa Daanbantayan mag-atbang usab si Bise Mayor Maria Luisa Loot ug Francisco Corro.
Samtang sa Dumanjug, mag-atbang usab ang igsuon ni Gobernador Gwendolyn Garcia nga si Nelson Garcia batok sa first councilor nga si Contrano Gongon Gica, samtang sa Tuburan si Mayor Rosemarie Suezo atbangan usab sa magpapatigayung si Aljun Diamante ug ang lungsod sa Ronda mag-atbang sila si Mayor Esteban Sia ug Bise Mayor Nonie Blanc. - BANAT NEWS