CEBU, Philippines - Napanglantawan nang daan sa kandidato sa Kugi Uswag Sugbu (Kusug) pagka-kongresista sa habagatang distrito sa dakbayan sa Sugbu nga si Jonathan Guardo ang ilang kadaugan sa umaabot nga eleksyon.
Kini tungod kay sila mas preparado ug mas nailhan sa mga botante sa dakbayan itandi sa mga kandidato sa Bando Osmeña Pundok Kauswagan (BOPK).
Gawas kaniya miingon si Guardo nga siya nakasigurong magmadaugon si Mary Ann delos Santos pagkakongresista sa north district sa 2010 elections.
Si Guardo magpapili pagkakongresista atbang kang Mayor Tomas Osmeña samtang si delos Santos makig-atbang usab kang Cutie del Mar.
Nakapanglantaw usab si Guardo nga lima sa ilang mga kandidato pagkakonsehal sa amihanang distrito modaug usab batok sa mga kandidato sa BOPK.
Ang mga kandidato sa BOPK sa north district naglangkob nilang Alvin Dizon, Alvin Arcilla, Nida Cabrera, Sisinio Andales, Noel Wenceslao ug ang mga incumbent councilors nga sila si Edgardo Labella, Augustus Pe Jr., ug Leah Japson.
Samtang ang muatbang niini sa Kusug mao sila si Joel Garganera, Jerry Guardo, Raymond Garcia, Patrick Talisaysay, Lemar Alcover, Danilo Fernan, Fritz Quiñanola ug Paul Melendez.
Sa pikas bahin, giangkon hinoon ni Guardo nga lig-on ang mga kandidato sa BOPK pagkakonsehal sa south district nga gilangkuban nilang Margot Osmeña, Ronald Cuenco ug ang mga incumbent councilors nga sila si Raul Alcoseba, Eduardo Rama, Richard Osmeña, Roberto Cabarrubias, Jose Daluz III, ug Rodrigo Abellanosa.
Apan masaligon si Guardo nga labing minos upat ka mga luna pagkakonsehal sa habagatang distrito ang makuha sa Kusug sa 2010 elections.
Apan si Mayor Osmeña mitubag lang niini nga libre ang magdamgo ug walay makapugong sa mga sakop sa oposisyon niini ilabi na kang Guardo, apan di sila mokumpiyansa. - Elly Bolonos (BANAT NEWS)