CEBU, Philippines - Dul-an sa 100 ka panimalay ang naugdaw kagahapon sa alas 10:23 sa buntag sa dihang naigo sa sunog ang upat ka sitio sa barangay Calamba, dakbayan sa Sugbo.
Sa pagsulat ning balita, laing 45 minutos nga sunog miigo sa sitio Siwak, barangay Bulacao, ning dakbayan. Giigo sa sunog ang residential area, apan sa pagsulat ning balita, ang kabomberohan padayong nag-imbestigar pagtino sa gidaghanon sa balay nga gikaon sa sunog nga mi-ulbo alas 6:35 ug nakontrolar alas 7:15 kagabii.
Ang sunog sa barangay Calamba nagsugod sa panimalay sa managtiayong Tommy ug Rosnel Catabay nga nahimutang sa sitio Almacin. Lakip sa naigo sa sunog mao ang mga sitio Alsika, Cup Grass ug San Roque.
Gikatahong electric fan nga wala maibot ang hinungdan sa sunog.
Si Supt. Ismael Codilla, fire marshal sa Cebu City Fire Department mibanabanang mokabat sa P4.8 milyones ang gibilin nga danyos sa mga panimalay nga naugdaw.
Si Codilla miingon nga ilang giisa sa Task Force Bravo ang sunog ug miresponde ang ubang mga fire stations.
Hinuon nakontrolar ang sunog sulod lang sa 48 minutos, matud ni Codilla.
Giangkon sa fire marshal nga naglisod ang mga bombero pagpakgang sa kalayo tungod sa kahagip-ot sa lugar ug gamay kaayo ang mga dalan nga kaagian sa firetruck.
Ang mga bombero misumpaysumpay sa mga hose gikan sa dalan V. Rama aron makaabot sa kabalayan nga naigo sa kalayo.
Apan paspas kaayong gilamoy sa kalayo ang mga balay, ilabi na ang kadaghanan nga ginama lamang sa mga light materials.
Sumala pa ni Codilla nga usa sa nakalangay sa mga bombero mao ang kawalay agianan. Adunay mga nag-ali sa dalan nga iyang gipaguba ug adunay mga firewall sa mga pribadong establisamento nga gibuslotan.
Si SFO2 Roylin Maratas, imbestigador sa Cebu City Fire Department nga gikahinabi sa DySS Super Radyo ug Banat News nagkanayon nga ang managtiayong Catabay nanglaba sayo sa buntag kagahapon mga 100 ka metros ang gilay-on gikan sa ilang panimalay.
Matud pa ni SFO2 Maratas nga hugtanong mihimakak ang managtiayon nga didto sa ilang panimalay nagsugod ang kalayo ug ang electric fan nga wala maibot maoy hinungdan sa sunog.
Ang managtiayon mibutyag nga wala na nila gamita ang ilang electric fan sanglit gubaon na kini ug saba paminawon.
Hinuon miingon ang fire investigator nga ilang ipatawag ugmang adlawa ang managtiayon aron kuhaan og pamahayag.
Si SFO2 Maratas miingon nga adunay silingan sa magtiayon nga nailang si William Auman nga mitug-an sa mga imbestigador nga electric fan iyang nakit-an sa wala pa moulbo ang sunog.
Giingong mga 30 minutos human nakit-an ni Auman ang electric fan sa managtiayong Catabay, misunod gilayon ang sipang buto dayon miulbo ang kalayo.
Dugang ni SFO2 Maratas nga usa ka Arnel Lantape nga traysikad driver ug nagpuyo sa nahisgutang lugar ang nakuryentihan atol sa sunog tungod sa aksidenteng pagkupot sa linya sa kuryente nga gibanting sa pagpugong sa poste sa VECO.
Nakit-an kini ni SFO2 Maratas nga mikirig hinungdan nga gitabang si Lantape sa mga residente ug mga bombero ug gidala sa tambalanan sa mga sakop sa Emergency Rescue Unit Foundation (ERUF).
Laing sunog nga miigo sa usa ka bodega sa sitio Nonoc, barangay Tabunok, dakbayan sa Talisay mibilin og P150 mil nga danyos.
Si SFO1 Cesar dela Cerna miasoy sa Banat News nga ang nasunog mao ang Aldwin Variety Store Warehouse nga gipanag-iya ni Willy Magbutay.
Gituohan ni SFO1 dela Cerna nga ang paggamit og ‘octopus outlet’ maoy hinungdan sa sunog. – BANAT NEWS