CEBU, Philippines - Sobra lima ka libo ka mga tawo sagad nila gikan pa sa bukirang bahin ang nagpahigayon og torch parade pagpadayag sa ilang suporta atol sa pag-sang-at sa kandidatura ni Aljun Diamante pagka-mayor sa lungsod sa Tuburan atbang sa asawa ni incumbent mayor Boyet Suezo nga si Rosemarie Suezo.
Ang mga kandidatu pagka-gobernador sa United Cebu nga affiliated sa Liberal Party (LP) kanhi Konsehal Hilario Davide III ug runningmate nga si Bise Gobernador Gregorio Sanchez personal nga misaksi sa pagduso sa kandidatura ni Diamante sa buhatan sa Comelec alas 8sa gabii pipila ka oras sa wala pa hingpit mapupos ang deadline sa filling niadtong miaging gabii.
Apil sa miduso sa kandidatura ang runningmate ni Diamante nga si kanhi bise mayor Ado Pesiao ug mga lineup pagkakonsehal nga sila si incumbent councilor Marie Tabotabo, Andot Potenciano, Junie Retubado, Rosendo Mendoza, Danny Diamante, Alden Jurlano, Eddie Ondoy ug Piding Montebon.
Sa wala pa giduso ang kandidatura usa ka Santos nga Misa ang gipasiugdahan sa mga kandidatu sa United Cebu sa simbahan sa lungsod ug diha na nag-abot ang mga tawong nagbitbit og sulo.
Si Sanchez nagpasalamat sa presensya sa mga Tuburanon nga mipadayag sa ilang init nga suporta ingon man usab si kanhi kongresista Antonio Yapha nga subling magpapili sa maong posisyon atbang ni kongresista Pablo John Garcia.
Mitambong sab si bokal Ma. Victoria Corominas ingon man ang asawa ni Yapha nga si Dr. Estrella Yapha nga kandidato pagka board member sa United Cebu.
Nasayran nga ang lungsod sa Tuburan nga yutang natawhan ni Sanchez maoy usa sa hinungdan sa pagbiya niya sa One Cebu party ni Governor Gwendolyn Garcia ang pagdawat niini sa pamilyang Suezo nga kontra sa politika ni Sanchez nga walay konsultasyon sa mga miyembro sa partido.-BANAT NEWS