CEBU, Philippines - Napulo og lima ka mga guest relation officer(GRO) naluwas sa mga kapolisan nga sakop sa 7th Regional Criminal Investigation and Detection Unit (7th RCIDU) gikan sa usa ka KTV Bar M. Patalinghug Avenue sa barangay Pajo, syudad sa Lapu-lapu sa miaging buntag.
Sila mao si Anne Cruz, 42, Jennie Tan, 38, Joan Canesteal, 25, Res Ismael, 20, Cathy Moratos, 28, Sally Rose Delgolante, 19, Mechelle Sanchez, 23, Lycalyn Mendoza, 21, Apole Villa, 26, Grace Gallano, 29, Ruby Lactan, 21, Jilian Salazar, 22, Joy Gomez, 30 Jocelyn Canete, 29, ug si Ruby Pareno. Sa affidavit of arrest sa 7th RCIDU, kini nagbutyag nga una nila masalbar ang mga biktima , nakadawat sila og taho gikan sa usa ka nagpakabanang lungsoranon kalabot sa giingong mga babaye nga namaligya sa ilang lawas sa Frolics Bar and Grill.
Busa dihadiha mihimo dayon og lakang ang kapolisan pinaagi sa pagpaniid sa kalihokan sa maong establisamento nga gipanag-iya sa usa ka Teresita Calzada sa nahisgutang lugar.
Si PO3 Arnold Bocayong nakadesider nga mosulod sa maong establisamento aron pagsuta sa giingong mga babaye nga nagbaligya sa ilang lawas ngadto sa ilang mga kustomer nga lalaki.
Didto gitestingan dayon niya og bayad og P1500 si Ruby Pareno ug dihang misugot kini, gisinyasan dayon niya ang iyang mga kauban nga pasudlon sa bar. Didto gipagawas dayon nila ang 15 ka mga babaye samtang ang tag-iya sa maong bar nga si Calzada wala diha busa wala hidakpi sa mga otoridad. (Lesley Caminade) (BANATNEWS)