CEBU, Philippines - Nasikop sa kapolisan ang usa ka tawo nga naghupot og ginadiling drugas sulod sa balay sa usa unta ka dakpunon sa kapolisan sa sitio Mahayahay, barangay Bankal, dakbayan sa Lapulapu sa milabay'ng gabii.
Ang nasikop mao si Richard Jardio, 24, minyo, nga taga Mahayahay, apan didto hisakpi sa balay ni Ramonito Tiro ang dakpunon unta sa kapolisan niadtong higayona.
Matud pa ni SPO2 Rex Cabrera, ang team leader sa Intelligence Section, nga miadto sila sa balay ni Tiro kauban ang mga sakop sa BIN aron hatdan kini (Tiro) og Warrant of Arrest.
Apan imbes si Tiro maoy ilang maabtan, si Jardio na hinuoy mipakita didto ug sa dihang ila kining girekisa nakuhaan gyud nila og duha ka pakiteng shabu.
Si Tiro nga nakasibat, gipangita pa karon sa kapolisan apan si Jardio nagpahayahay na karon sa prisohan sa Lapulapu. – BANAT NEWS