CEBU, Philippines - Miduso na sa iyang Certificate of Candidacy (COC) ang pangulo sa Go Cebu movement nga igsuon ni Cebu City Mayor Tomas Osmeña nga si Georgia Osmeña kagahapong adlawa.
Si Georgia, desididong mohulip sa iyang maguwang nga anaa na sa ikatulo ug katapusang termino.
Uban ni Georgia nga miduso sa iyang COC kagahapon mao ang duha sa iyang mga kandidato pagkakonsehal sa dakbayan.
Una nang niduso niadtong miaging adlaw sa iyang COC ang runningmate ni Georgia nga si Emmanuel Pacquiao uban sa pipila usab sa ilang mga kandidato pagkakonsehal. Sa kasamtangan, si Georgia dunay duha ka kandidato pagkakonsehal sa north district nga sila si Fe Bilar ug Jose Delgado, samtang upat usab sa south district nga naglakip nilang Ramon Pandaan, Alexander Mancao, Emma Cabrera, ug Mariter Madrona.
Apan gipahibawo ni Georgia ngadto kang City Election Officer Marchel Sarno nga kini mobutang og kompletong lineup sa pagkakonsehal ug gipaabot nga makumpleto sa dili pa ang deadline sa filing dungan sa pagduso sa ilang mga COC.
Kung mapili nga mayor sa siyudad sa umaabot nga eleksyon, gipasalig ni Georgia nga mabalik ang dakbayan sa numero unong posisyon isip Queen City of the South.
Sa pikas bahin, wala pa gyud makapili ang Kugi Uswag Sugbu (Kusug) og kandidato alang sa pagkamayor ug bise mayor alang sa 2010 elections.
Gipadayag hinuon ni Kusug chairman Alvin Garcia nga anaa ra nilang tulo ni Samuel Darza, ug GSIS president Winston Garcia ang pilianan.
Ang kadagkuan sa Kusug giingong magtigom pa karong adlawa aron sa pagdesider kung kinsa ang ilang himuong stardard bearer. Apan ang pipila ka sakop sa maong grupo ang gitakda na nga moduso sa ilang COC karong buntag human sa usa ka Santos nga Misa nga naglakip nila ni congressional aspirants Jonathan Guardo ug Mary Ann delos Santos ug ang pipila ka mga kandidato niini pagka-konsehal.
Samtang gipaabot usab nga ang mga kandidato sa Bando Osmeña Pundok Kauswagan (BOPK) moduso sa ilang COC karong buntag. – BANAT NEWS