CEBU, Philippines - Ang Muslim communities dinhi sa Sugbo mikondenar sa nahitabong masaker didto sa Maguindanao niadtong Lunes nga gikatahong kapin sa 50 ka mga tawo – apil na ang mga babaye ug mga sakop sa media -- ang gipamatay tungod sa panagribal sa politika.
Sumala pa ni Uztadz Najib Razul sa Office of Muslim Affairs (OMA) sa Sugbo nga dili madawat sa ilang relihiyon ang pagpatay sa mga babaye kay dili kini hilabtan ubos sa ‘rules of engagement.’
Si Razul mihulagway sa masaker nga gika-report nga binuhatan sa mga Ampatuan sa Maguindanao nga dili binuhatan sa usa ka Muslim tungod kay walay Muslim nga anaa sa saktong panghunahuna nga mopatay og babaye nga walay ikasukol.
Si Department of Interior and Local Government (DILG) regional director Pedro Noval miklaro hinuon nga wala siya'y nadunggan nga politiko dinhi sa rehiyon nga nagbaton og private army.
Gitataw usab ni Noval nga ang mga bodyguards ug mga close-in security details sa mga politiko nga gikan sa Philippine National Police dili matawag og private army.
Samtang si Police Regional Office (PRO-7) director Lani-O Nerez miingon nga ilang gisusi ang mga politiko karon sa rehiyon aron pagtino kinsa kanila ang nagbaton og priate army.
Matud niya nga gituki kini sa command conference kagahapon.
Si Nerez nagkanayon nga gisugdan na usab og recall ang mga polis nga gihimong bodyguard sa mga politiko. – BANAT NEWS