CEBU, Philippines - Gireklamo sa mga parokyano niini ang kura paroko sa usa sa mga lungsod sa habagatang bahin sa Sugbu tungod sa giingong pamolitika niini atol sa pagpahigayon og Santos nga Misa.
Ang maong pari (ngalan gipugngan una sa Banat News hangtud di makuhaan sa iyang habig) gikatahong dayag kaayong nangampanya pabor sa usa ka tawong giingong nagplanong modagan pagkamayor sa maong lungsod ug miawhag nga kini maoy pabotaran karung umaabot eleksyon sunod tuig.
Segun sa unod sa maong suwat nga miabot dinhi sa Banat News dihay tulo ka mga higayon nga human sa misa sa maong pari kini miingon “Ato unyang pilion si Marlon ha, kay maluoy ta sa lungsod.”
Lakip sa gihulagway sa mga reklamante nga pamolitika atol sa Santos nga Misa mao ang pag-ingon sa maong pari “Nganong magpasubli paman ning mayor nga wala’y agi?” ug “Sikata naman gyud diay aning M___ no? Kay daghan mang nabutang mga followers!, Maayo ning Garcia kay gracia.” Daan nang nipasidaan si Monsignor Achilles Dakay ngadto sa tanang kaparian nga dili gyud mag-apil apil sa kamada sa politika ug labaw sa tanan dili dad-on ang politika sa ilang pagpahigayon og misa.
Gawas pa niini, si Dakay nagkanayon nga wala silay dapigan ni bisan kinsang politiko ilabina karun nga nagkaduol na ang eleksyon sunod tuig.
Ang pasidaan ni Dakay, butang nga wala tumana sa maong pari hinungdan nga mireklamo ang iyang mga parokyano. Nakasaway ang mga parokyano sa ilang sulat tungod kay matud pa nila, ang mga kaparian sa simbahang katoliko mao untay mosangyaw kun unsay maayong pagtulon-an subay sa nahisulat sa Bibliya.
Ang mga parokyano nipadala usab sa susamang kopya sa reklamo ngadto kang Cebu Archbishop Ricardo Cardinal Vidal nga naghangyong matabangan sa ilang reklamo.
Ang maong pari nadestino kaniadto sa San Fernando Parish Church apan gipetisyonan sa mga parokyano tungod sa daghang reklamo hinungdan nga gibalhin siya diha sa maong lungsod. (BANATNEWS)