CEBU, Philippines - Patay nang nakit-an ang usa ka ginang human kini maghikog gamit ang pisi nga gihigot sa iyang liog ug gibaat sa kisame ang pikas tumoy sulod sa ilang pinuy-anan didto sa Poblacion, siyudad sa Danao, niadtong Huwebes sa alas 8:30 sa buntag. Ang nagpakamatay giila nga si Maria Morena Fernandez Arriesgado, 27, walay klarong trabaho ug molupyo sa nahisgutang lugar.
Matud ni SPO3 Arestio Espina sa Danao City Police Station sa dihang nahinabi sa Banat News nga ang kapuyo ni Arriesgado nga si Benjamin Enriquez, 44, usa ka upholstery maker maoy nakadiskobre sa nagbitay nga lawas sa biktima.
Nakit-an ni Enriquez nga nagdiwalwal na ang dila sa iyang kapuyo nga wala nay panimuot sa ikaduhang andana sa ilang panimalay hinungdan nga daling gipahibalo ang kapolisan. Gisulayan pa unta sa pagtabang si Arriesgado apan wala na gyud madala pa.
Bisan pa niini, girekomendar gihapon sa kapolisan nga ipaubos sa autopsy ang patay’ng lawas aron pagtino kun wala ba kini foul play. - Darrel Carumba (BANAT NEWS)