CEBU, Philippines - Usa ka vintage bomb nga gituohang gigamit sa mga sundalong Hapon sa ikaduhang gubat sa kalibutan nakalotan sa mga construction worker nga nagtrabaho sa usa ka beach resort sa lungsod sa San Fernando niadtong Huwebes sa alas 10:30 sa buntag.
Si Chief Inspector Jovito Canlapan, hepe sa San Fernando Police Station sa dihang nahinabi sa Banat News miingon nga ang gwardiya sa Pulchra Beach Resort nga si Rey Garcia maoy mipahibalo sa ilang buhatan kabahin sa nadiskobrehang bomba.
Gibutyag ni Chief Insp. Canlapan nga bisan tayaon ug karaan na og porma ang maong vintage bomb, mahimo gihapon kini nga mobuto tungod kay kompleto pa ang porma niini.
Hinuon daling gi-turnover sa Bomb Disposal Unit sa CPPO ang maong bomba aron ma-dispose kini paglikay sa peligro.
Ang maong lugar gikatahong gihimong kota sa mga Hapon atol sa pag-ulbo sa ikaduhang gubat sa Pasipiko. - Darrel Carumba (BANAT NEWS)