CEBU, Philippines - Giingong mastermind sa pagpatay sa duha ka Koreano nadakpan na sa kapolisan sa Hongkong human kini giingong mibiya dayon human sa krimen samtang giingong nadakpan na usab ang Filipino driver niini nga nagmaneho sa multicab nga gikargahan sa duha ka biktima paglabay sa patay'ng lawas diha sa barangay Uling sa Naga niadtong Domingo.
Si Police Regional Office-7 director, Chief Supt. Lani-O Nerez miila sa mastermind nga si Park Tai Sung, giingong lider sa sindikatong gihulagway ni Nerez nga ‘mafia’ style.
Si Park gitanggong na sa Hongkong Police uban sa International Police human nakasibat gikan dinhi sa Sugbu niadtong Lunes sa alas 9:00 sa gabii sa petsa 16 ning buwana.
Samtang wala pay kumpirmasyon gikan sa ubang law enforcement unit sa Sugbu kun si kinsay nakadakop sa Filipino driver niini nga giingong nadakpan na usab.
Si Nerez nagkanayon nga si Park duha na ka tuig nga nagtago dinhi sa Sugbu ug nag-negosyo human milayas sa South Korea gumikan sa dagkong kaso sa swindling activities ug may warrant of arrest na.
Gibutyag niini nga si Park dunay business partner nga laing Koreano dinhi sa Sugbo apan nakalarga na usab balik sa Korea niadtong Martes petsa 17 sa kaadlawon.
Ang gipatay mao sila si Choi Ho Sun ug Yang Soon Suk kansang mga patay'ng lawas nabulit og samad pinusilan ug dinunggaban ug gilabay sa barangay Uling sa lungsod sa Naga niadtong milabay'ng Domingo.
Nangabot na usab ang mga kabanay sa mga biktima dinhi sa Sugbu niadtong Miyerkules ug gilaumang makatabang sa ilang imbestigasyon sa pagkuha nila'g dugang impormasyon sa mga kalihukan didto sa South Korea. – BANAT NEWS