CEBU, Philippines - Nagsugod na pagpuno si kanhi senador John Henry “Sonny” Osmeña sa iyang lineup alang sa umaabot nga eleksyon sunod tuig, ang kanhi senador nga desididong magpapili pagkamayor sa siyudad sa Sugbu.
Matud pa ni Osmeña nga pipila sa dalhon sa iyang ticket mao ang mga kandidato gikan sa Bando Osmeña Pundok Kauswagan (BOPK) ug sa Kugi Uswag Sugbu (Kusog).
Wala man dawata ni Mayor Tomas Osmeña ang tanyag sa kanhi senador nga himuon niyang bise mayor, apan kini dili niya paatbangan sa 2010 elections.
Dili usab paatbangan sa kanhi senador og kandidato si Rachel del Mar nga maoy kandidato sa BOPK pagkakongresista sa amihanang distrito sa dakbayan.
Dalhon usab sa lineup ni Sonny pagkakonsehal sa south district mao ang asawa sa mayor nga si Margot Osmeña, Konsehal Richard Osmeña, Eduardo Rama ug Joey Daluz.
Samtang sa north district, gilista nang daan sa kanhi senador alang sa pagkakonsehal sila si Leah Japson ug Konsehal Edgardo Labella.
Ang dili dalhon ni Sonny sa mga incumbent councilors mao lang si Konsehal Augustus Pe Jr. sa north district, ug Konsehal Raul Alcoseba, Roberto Cabarrubias ug Rodrigo Abellanosa sa south district.
Nagkanayon ang kanhi senador nga ang nahabiling mga luna alang sa pagkakonsehal adto na niya kuhaon sa mga kandidato gikan sa oposisyon.
Usa na niini mao ang retired general ug abogado nga si Fritz Quiñanola nga nagpapili ubos sa partidong Kusog kaniadto ug napildi.
Midugang si Sonny nga iya usab nga gilakip sa lineup pagkakonsehal sa siyudad ubos sa Partido Panaghiusa mao ang pipila ka newcomer sama sa usa ka Jimboy Tionko.
Nagpabilin pang bakante ang kandidato pagka-bise mayor sa kanhi senador tungod kay iya pang gipaabot ang pagsanong sa igsuon sa mayor nga si Georgia Osmeña. (Elly Bolonos) (BANATNEWS)