CEBU, Philippines - Pormal nang mipahibalo sa ilang tandem si Nacionalista Party standard bearer Senador Manuel "Manny" Villar ug Loren Legarda sa Nationalist People's Coalition isip bise-presidente niini sa 2010 elections kagahapon. Sa report sa ANC kagahapon gitawag ni Villar ang ilang tandem nga "a convergence of platforms," ug gipili niya si Legarda dili susama og ‘political accommodation’ kundili tungod kini sa panagkaparehas sa ilang tinguhang mawagtang ang kakabus dinhi sa nasud.
Si Villar nagkanayon nga si Legarda lahi og pamaagi sa pamolitika ug sa liderato niini, gidayeg niya si Legarda sa paghingusog niini sa pagprotiher sa kinaiyahan.
"This is compatible with my platform to eradicating poverty...It is the poor who suffer the most from the negative effects of environmental degradation," matud pang Villar.
Si Legarda sa iyang bahin mibutyag nga walay mahitabong merger sa ilang mga partido alang sa 2010 elections apan managsama gyud ang ilang mga plataporma.
Dugang pa niini nga ang liderato sa NPC mitugot niini human ang ilang gipiling standard bearer nga si Sen. Francis Escudero nibiya sa partido.
"Umalis ang aming standard-bearer ng walang sabi-sabi. I was given the blessing and support of the entire party to look for my standard bearer," pasabot pang Legarda. (Edwin Ian Melecio) (BANATNEWS)