CEBU, Philippines - Gipusil ug napatay sa usa ka gwardiya ‘nakatulog’ sa iyang pwesto ang iyang supervisor pasado alas 9 sa miaging gabii diha sa dalan D. Jakosalem sa barangay Cogon- Ramos human mobahad ang biktima nga mosumbong sa ilang buhatan kabahin sa iyang pagkatulog sa pwesto.
Giila ang biktima mao si Elmer Sanico,42, security supervisor sa Sentinel Security Agency nga wala na makaabot sa tambalanan human kini gipusil sa iyang sakop nga si Loreto Javines,54, taga Bantayan sa Hari, barangay Looc sa syudad sa Mandaue.
Usa ka Romulo Cabillanaro ang nakabati og buto sa armas ug sa iyang paglingi nagdagan na ang iyang supervisor nga gigukod sa suspetsado.
Gisuwayan unta niya pagtabang si Sanico apan giusban pagpusil sa suspetsado ang biktima kinsa nadiretso og kahagba. Si Sanico gidali pagdala ngadto sa Chong Hua Hospital apan gideklarar kining dead on arrival. Matud pa ni PO2 Julius Mabunay sa Crime Against Person Section sa Cebu City Police Office si Sanico duna samad pinusilan sa tiyan ug likod nga maoy gituohang nakaingon sa hinanali niining kamatayon.
Dugang pa sa imbestigasyon nila ni Mabunay, nga sa wala pa mahitabo ang pagpamusil sa biktima nasakpan si Javines ni Sanico nga natulog sa iyang gibantayang pwesto.
Matud pa ni Mabunay mibahad ang biktima nga iyang ipaabot sa ilang labaw ang nadiskubrehang pagkatulog ni Javines. Ang suspek giingong mihangyo kang Sanico nga dili nalang mosumbong ngadto sa ilang labaw apan gituuhang nagdumili ang biktima hinungdan sa kasuko sa suspek ug gibunot ang iyang service firearm nga .38 kalibreng rebolber dayong pusil sa supervisor. Ang suspek mitahan hinuon sa mirespondeng polis lakip na ang gigamit niyang armas ug kasamtangan karong nagtingkagol sa karsel. Si Fina Gonzales, usa sa mga administrative staff sa nahisgutang security agency nagkanayon nga naka-text pa si Sanico sa iyang asawang mabdos nga kini napusilan.
Dugang pa ni Gonzales nga mga batan-ong estambay maoy mitabang sa paghatud kang Sanico sa tambalanan. Samtang ilaha na usab gihikay ang pagtabang sa kabanay sa namatay. (BANATNEWS)