CEBU, Philippines - Patay nang miabot sa tambalanan ang usa ka tigpatanto human kini pusila sa usa ka batan-on atubangan sa iyang uyab diha sa dalan Osmeña sa barangay Poblacion dakbayan sa Lapulapu kagahapon sa kaadlawon.
Ang biktima mao si James Angus Villanueva, 25, residente sa sitio Timpolok, barangay Babag dakbayan sa Lapulapu kinsa giingong anak sa usa ka dakong opisyal sa usa ka kompanya diha sa Mactan Export Processing Zone apan nagnegosyo og pautang.
Wala pa mailhi sa kapolisan kun si kinsa ang mamumuno niini apan kini gihulagway nga usa ka batan-on.
Base sa pasiunang imbestigasyon ni SPO1 Honorato Inihao sa Crime Against Persons (Homicide) nasayran nga nakig-inom si Villanueva kuyog ang iyang hinigugmang si Ivy Monroid ug mga higala nianang tungura dihang kalit giduol sa usa ka batan-on dayong dul-it og pusil sa walang bahin sa likod nga milapos sa dughan ni Villanueva.
Si Villanueva naigo sa likod nga bahin sa lawas gamit ang kalibre .45 samtang ang mga kaubanan niya nagkatibulaag og panagan, ang mamumuno dali usab nga miikyas sa dapit.
Daling gidala sa tambalanan sa Mactan Doctors Hospital apan gideklarar kining patay nang miabot sa maong tambalanan.
Nakuha sa kapolisan sa crime scene ang usa ka kabhang sa bala sa kalibre .45 nga gituhoang maoy gigamit sa pagpusil sa biktima.
Matud pa ni SPO1 Inihao usa sa ilang gisubay karong anggulo sa motibo sa pagpatay kaniya mao ang negosyo niining pagpatanto og salapi ug ingon man personal nga gikabangi sa biktima sa mga nanglabay'ng adlaw. (BANATNEWS)