CEBU, Philippines - Posibleng maapektohan ang kasabutan tali ni Gobernador Gwendolyn Garcia ug mga residente sa barangay Apas sa kasong gisang-at sa kagamhanan sa lalawigan sa Sugbo ug mga sakop sa Alliance of Barangay Apas Community Association (ABACA) batok sa gobernadora, Defense Secretary Gilbert Teodoro, Bise Presidente Noli de Castro ug Housing and Urban Development Coordinating Council ug National Housing Authority.
Matud pa ni Capitol consultant on information Rory Jon Sepulveda nga ang saad sa Kapitolyo nga magpabilin ang mga residente sa lote sa Central Command sa barangay Apas magdepende sa desisyon ni Garcia karong adlaw’ng Lunes.
Sumala pa ni Sepulveda nga ang mga opisyales mismo sa ABACA ang gikasabot sa gobernadora ug gisaaran nga dili papahawaon sa maong lote, apan nangapil sa kasong gisang-at.
Hinuon, si Sepulveda miingon nga sa dili pa sila mohimo og lakang, ila pa una paabuton ang kopya sa kaso nga gipasaka sa siyudad.
Ang kasong civil nga gisang-at sa siyudad nagkuwestiyon sa memorandum of agreement (MOA) tali sa DND ug Kapitolyo aron i-uli ang luna sa Centcom ngadto sa Kapitolyo. Gitataw sa ABACA nga wala respetohi sa DND ug Kapitolyo ang Presidential Proclamation No. 409 nga nagpa-ubos sa maong luna isip socialized housing area alang sa mga urban poor.
Mi-uban sa kaso silang Mayor Tomas Osmeña, Kapitan Ramil Ayuman sa barangay Apas ug mga sakop sa ABACA, pinaagi sa presidente nga si Linda Paracueles.
Gipangayo usab nila sa korte nga ihunong ang pagpatuman sa MOA pag-uli sa lote ngadto sa Kapitolyo.
Si Sepulveda miingon nga wala sila matarog sa kaso. (Chester Abadilla) (BANATNEWS)