CEBU, Philippines - Dugang ebidensya ang giduso sa mayoriya sa mga sakop sa konseho sa lungsod sa Compostela pinangulohan ni Bise Mayor Joel Quinio ngadto sa buhatan ni Ombudsman Visayas assistant director Virginia Palanca Santiago kagahapon pagmatuod sa ilang alegasyong gi-waldas sa ilang tresurerong si Lorenzo Almogiel ug Mayor Ritchie Wagas ang panudlanan sa lungsod.
Gibutyag ni Tessa Cang ang chairman sa committee on budget and appropriation sa konseho dihang nahinabi sa Banat News nga lakip sa ilang mga ebidensiyang giduso kang Santiago mao ang pipila ka mga dokumento sa transaksyon sa lungsod nga gi-disallow sa Commission on Audit (COA).
Gibutyag ni Cang nga dugang kining ebidensiya sa unang findings sa COA kabahin sa cash shortage sa ilang lungsod nga mikabat sa P7.5 milyones subay sa gihimong post audit gikan niadtong buwan sa Hulyo 2007 hangtud sa milabay'ng Disyembre 2008.
Matud pa ni Cang nga wala pa kini labot sa buwan sa Enero ning tuiga hangtud karun bulana nga subject pa sa post audit sa COA.
Nagdumili una hinuon pagtug-an si Cang kun unsang klaseng transaksyon ang nadiskubrehan nilang wala masubay sa hustong proseso gumikan kay gi-advise sila sa Ombudsman nga pormal kining isang-at isip dugang ebidensya sa pending nga kaso sa nahitabong cash shortage sa lungsod.
Samtang si Quinio sa iyang bahin nagdumili pagtug-an sa maong mga kwestyonableng transaksiyon gumikan kay ilaha pa una kining tukion atol sa ilang regular session una pa nila hatagan og pormal nga kopya sa mga dokumento ang ombudsman.
Samtang gisuwayan unta pagkontak ning tigbalita ang buhatan ni Mayor Wagas apan matud pa sa nakatubag kagahapon sa udto nakalakaw na ang mayor. – BANAT NEWS