CEBU, Philippines - Gipasaka na sa dakbayan sa Sugbu ug mga residente sa barangay Apas ang kasong nag-awhag pagpahigayon og “judicial review for declaration of nullity and unconstitutionality and injunction with prayer for preliminary injunction with temporary restraining order” batok sa lalawigan.
Ang mipasaka og kaso mao sila si Mayor Tomas Osmeña, kapitan sa barangay Apas nga si Ramil Ayuman ug Maria Linda Paracuelles nga nagrepresentar sa Association of Barangay Apas Community Associations (ABACA) inabagan sa ilang abogadong si Atty. Benjamin Militar.
Ang gikasuhan sa grupo mao sila si Gov. Gwendolyn Garcia, Bise Presidente Noli de Castro isip chairman sa Housing Urban Development Coordinating Council (HUDCC), Defense Secretary Gilberto Teodoro, National Housing Authority project manager Gavino Figuracion, HUDCC regional director Fernando Garso ug Chloe Osano ang regional director sa Presidential Commission for the Urban Poor. Ang dakbayan mikwestyon sa gihimo sa lalawigan pagpapahawa sa mga residente sa barangay Apas nga nasakop sa ilang City Ordinance 2136 nga nagdeklarar sa mga barangay nga mga Socialized Housing Zones subay sa RA 7279, Presidential Proclamation 409 ug uban pang patakaran nga gipatuman sa dakbayan.
Samtang ang mga sakop sa Abaca ug opisyales sa barangay Apas nag-awhag sa korte nga ipatuman ug respetuhon sa lalawigan ang nahaunang proklamasyon nga nagsigurong magpabilin ang mga molupyo sa maong lugar.
Ang mga taga Apas bisan gisaaran ni Garcia niadtong sayong bahin ning bulana nga di na sila papahawaon mipadayag nga naaghat sila sa pagpasaka sa maong kaso gumikan sa kahiubos ngadto sa gobernador nga nagpakawalay bili sa PP 409, nga giisip nilang maoy seguridad nila aron magpabilin sa maong dapit. - Edwin Ian Melecio (BANAT NEWS)