CEBU, Philippines - Pormal nang ipahibawo ni kanhi Mayor Thadeo Ouano sa dakbayan sa Mandaue ang bahin sa iyang pagsalmot sa umaabot nga piniliay sa tuig 2010.
Matud pa ni Antero Cana, Jr.kinsa maoy tigpamaba sa kanhi mayor nga igo lamang kining misanong sa awhag sa iyang mga lumalaban, apan gipaabot pa niini ang pormal nga deklarasyon ni Senador Manuel Villar sa iyang kandidatura isip standard bearer sa Nationalista Party (NP).
Miingon si Cana nga dili lamang ang bahin sa kang Villar kundi lakip na usab ang mahimong tandem o bise presidente nga kandidato niini maoy iyang gipasabot.
Matud pa ni Cana nga ganahan gyud magkongresista si kanhi Mayor Ouano samtang ang anak niini nga si Emmarie Lollipop Ouano Dizon gusto usab nga magkonsehal sa maong dakbayan.
Samtang ang lain niyang anak nga si Alfred Francis Alfie Ouano sa Consolacion gitakda usab nga magpapili pag-usab sa umaabot nga election.
Si kanhi mayor Ouano maoy mohulip kang Kongresista Nerissa Soon-Ruiz sa ikaunom nga distrito kinsa anaa na sa katapusan niyang termino ug nangandam usab nga magpapili pagka-mayor sa dakbayan sa Mandaue. - Romeo T. Limpangog (BANAT NEWS)