CEBU, Philippines - Si Provincial Board member Juan Bolo sa unang distrito ning lalawigan sa Sugbu miawhag sa simbahan nga tinud-on ang programa bahin sa pagpananum og kahoy o kaha pagpadonar og seedling ngadto sa mga magtutuo nga modawat sa sakramento.
Matud pa ni Bolo sa iyang napasar nga resolusyon nag-awhag nga ang maong programa sa simbahan makatabang pag-ayo sa pagpreserbar sa kalikupan ug aron dili masubli pa ang grabing baha didto sa Luzon nga mugna sa bagyong Ondoy ug Pepeng nga mikalas og kagatusan ka mga kinabuhi.
Si Bolo nagkanayon nga dugay na ang maong programa sa simbahan dinhi sa Sugbu nga gipasiugdahan ni Cebu Archbishop Ricardo Cardinal Vidal apan wala lamang matarung sa pagpatuman sa matag parokya.
Dugang pa ni Bolo nga karon na ang tukmang panahon sa hugot nga pagpatuman sa maong programa sa simbahan nga nag-require sa mga magpabunyag, magpakonpirmar ug magpakasal nga motanom una og kahoy o kaha modunar og seedling sa kahoy sa dili pa kini makadawat sa sakramento sa simbahan. - Chester Abadilla (BANAT NEWS)