CEBU, Philippines - Pakyas ang negosasyon tali sa duha ka barangay kapitan nga nag-ilog sa pagka- Presidente sa Association of Barangay Council kon ABC sa konseho sa dakbayan sa Mandaue isip ex-officio.
Kagahapon nagtagbo sila si Opao barangay Kapitan Juvita "Joy" Ouano ug Banilad barangay Kapitan Glenn Bercede atubangan ni Mandaue City Mayor Jonas Cortes aron husayon kun kinsa kanila ang molingkod sa konseho sa dakbayan sa Mandaue isip ABC President ug ex-officio councilor.
Ang duha pulos mga kaalyado ni Mayor Cortes ug walay nahimong resulta sa ilang sabotsabot kay wala usab mohatag og hukom si Mayor Cortes kung kinsa kanila ang palingkuron diha sa konseho.
Matud pa ni Bercede angayang siya ang molingkod sa pagkakonsehal ug ABC president gumikan kay siya maoy midaog pagka-presidente sa ABC sa milabay’ng piniliay ug dili si Ouano.
Dugang pa ni Bercede sayang kaayo nga duha na ka tuig kapin nga walay naglingkod nga konsehal sa ABC ug nagkaduol nalang ang eleksiyon wala pay makarepresentar kanila ngadto sa hawanan sa konseho.
Kahinumduman nga si Bercede mipasaka og petisyon sa korte dihang si Ouano maoy gideklarar nga mananaog sa mga sakop sa Liga ng mga Barangay nga nakakuha lang og walo ka botos atol sa piniliay samtang si Bercede nakakuha og 19 botos.
Ang petisyon ni Bercede gipaboran sa korte, apan igo lamang mipadayag ang korte nga illegal ang paglingkod ni Ouano ug wala kini mohatag og kamandoang si Bercede maoy palingkuron.
Gumikan niini, si Ouano sa iyang bahin miapelar ngadto sa Court of Appeals ug hangtud karon wala pay desisyong gipagawas ang maong korte kabahin sa maong isyu.
Ang Liga ng mga Barangay ug ang Konseho sa dakbayan sa Mandaue dili usab makadawat ni Bercede gumikan kay wala pay desisyon ang Court of Appeals.
Matud pa ni Atty. Francisco Amit nga masulbad lang ang maong isyu kun dunay panagsabotsabot tali sa duha ka mga kapitan ug usa kanila mohatag og higayon sa usa aron dunay makalingkod kanila diha sa Konseho.
Sumala pang Amit niining paagiha wala nay rason ang Konseho nga di dawaton ang representante sa mga barangay sa Mandaue paglingkod isip ex-officio sa hawanan sa Konseho.
Samtang si Cortes usab mipadayag nga wala siya’y supak bisan kinsa nila ni Bercede ug Ouano ang molingkod sa konseho apan ang duha gyud maoy angayang unang magkasinabot kabahin niini. (Bong Soriano) (BANATNEWS)