CEBU, Philippines - Nawad-an sa mga alahas nga nagkantidad og kapin sa P500 mil ang usa ka Korean national human mabiktima sa pagpanglungkab ang apartment nga gipuy-an niini sa mga sakop sa akyat bahay gang.
Ang pagpanglungkab nahitabo sa miaging gabii sa sitio Sto. Niño, barangay Banilad, dakbayan sa Mandaue sa miaging gabii.
Ang biktima mao si Che Yung Jung, 38, lumad nga taga Seoul, South Korea ug temporaryong nagpuyo sa nahisgotang dapit.
Ang nahanaw gikan sa biktima mao ang mga alahas nga naglakip sa upat ka gold nga kuwintas (P100 mil), usa ka parisan sa ariyos nga bulawan (P50 mil), singsing nga diamond (P300 mil) ug cellphone (P9 mil).
Sa imbestigasyon nga gihimo nila ni PO2 Ryan Sarabia ug PO1 Cristito Raboy sa Investigation Detection Management Bureau (IDMB), nasuta nga gikan pa sa trabaho ang biktima ug sa pagpauli niini, nadiskubrehan niini nga abli na ang pultahan ug nagkatuali na ang mga butang sa sulod sa lawak sa apartment.
Matud pa nila ni PO2 Sarabia nga gigamit sa mga kawatan ang hagdan sa Koreano ug misaka agi sa ikaduhang andana ug misulod sa giabangan niining apartment pinaagi sa pagtangtang sa bildo sa bintana. - Romeo Limpangog ug Bong Soriano (BANAT NEWS)