CEBU, Philippines - Babayeng naalaang shoplift mireklamong nauwawan human gipahubo sa ladyguard sulod sa usa ka tindahan sa Osmeña Blvd. sa barangay Kalubihan pasado alas 4 sa miaging hapon.
Ang biktima nga usa ka 28-anyos nga dalaga ug residente sa barangay T. Padilla midangop sa Carbon Police Station sa barangay Ermita aron isumbong ang gihimo kaniya sa maong gwardiya.
Ang biktima mitug-an sa kapolisan nga mianha siya sa lugar aron mamalit apan samtang namili kalit siya giduol sa usa ka babayeng gwardiya kansang pangalan wala niya makuha mipasangil kaniyang usa siya ka shoplift kon kawatan.
Matud pa sa babaye nga girekisa sa maong gwardiya ang tibuok niyang lawas ug wala pa gyud matagbaw gipahubo siya sa tanan niyang sapot lakip na ang panty aron tan-awon kun duna siya’y giluklok nga baligya.
Wala hinuon mabutang sa blotter kun ang pagpahubo kaniya gihimo sa usa ka pribadong lawak nga di makita sa ubang mamalitay ug kun duna bay laing tawo gawas sa babayeng gwardiya diha sa maong lawak.
Apan migawas nga walay bisan usa ka butang nga nakit-ang gitagoan ang biktima. Tungod niini gipapauli ang dalaga apan ang naulahi tungod sa kauwaw misumbong kini sa kapolisan. - Lesley Caminade (BANAT NEWS)