CEBU, Philippines - Pormal nang mihangyo ang Cebu South Mini-Bus Operators Association (CSMBOA) ngadto sa kagamhanan sa dakbayan sa Sugbu nga tugutang makatukod og kaugalingong terminal dinhi sa siyudad.
Ang presidente sa CSMBOA nga si Julito Flores nipadala na og suwat ngadto kang Mayor Tomas Osmeña nga nagpadayag sa ilang hangyo nga himuong terminal ang portion sa karaang Autobus terminal diha sa Natalio Bacalso Avenue.
Ang nahisgutang transport group dunay 58 ka mini bus operators nga miyembro ug dunay dul-an sa 200 ka mga units nga nagdagan sa habagatang Sugbu. Ilang giawhag si Osmeña nga hatagan sila og provisional authority aron makabalhin na sa bag-o nilang terminal human dunay mga taho nga ang mga mini-bus gihatagan na lang kutob karong Nobiyembre 15 pagsulod diha sa Cebu South Bus Terminal (CSBT).
Wala pa hinuon madawat sa mayor ang suwat sa CSMBOA apan gipadayag nang daan ni Osmeña nga kini dili problema.
“Ato nang i-reconsider kay niabuso na gyud ang probinsya, so, atong tan-awon ang concern sa mga pasahero kay pobre gud na sila,” matud pa ni Osmeña.
Apan gitataw sa mayor nga siya maminaw una sa opinyon sa Citom ingon man sa Terminal Accreditation Committee sa gitinguha sa CSMBOA. - Elly Bolonos (BANAT NEWS)