CEBU, Philippines - Personal nga gitunol ni Cebu Governor Gwendolyn Garcia ang hinabang sa lalawigan sa Sugbu ngadto sa mga biktima sa sunog sa barangay Opao, dakbayan sa Mandaue kagahapon sa buntag.
Uban ni Garcia mao si kanhi Mayor Teddy Ouano, Alfie Ouano, Kapitan Joy Ouano, sa Opao, Edmund Sanchez , ang Project Consultant ni Mayor Jonas Cortes, Provincial Social Welfare Head Marivic Garces ug Provincial Board Member Wenceslao Gakit.
Nadawat sa 158 ka mga pamilyang nasunogan ang kantidad nga P3 mil alang sa matag usa nga naugdaw nga balay ug P1,000 matag usa sa mga nag-abang ug nakig-ipon lamang sa usa ka panimalay.
Gikalipay sa mga biktima ang pagdawat sa maong mga hinabang kay dako kini og ikatabang sa pagpatukod og balik sa ilang panimalay.
Si Violeta Cabada ang hepe sa City Social Welfare Office mibutyag sa Banat News nga matud pa hangtod karon wala pa sila makahatag og mga dapat sa panimalay ngadto sa mga biktima gumikan kay gihikay pa nila karon ang mga purchase request sa mga materyales.
Unya wala pa usab sila makapabiding sa mga kompaniya sa konstruction nga buot mosuplay sa maong mga material.
Ang mga biktima padayong nangaliya nga dili unta langanon sa kagamhanan ang paghatag kanila sa maong mga materyales nga balor og P10 mil alang sa matag pamilyang nanag-iya og balay nga naugdaw. - Bong Soriano (BANAT NEWS)