CEBU, Philippines - Patay nang nakit-an taliwala sa katubhan ang usa ka traysikol drayber nga gitabangan og dunggab sa magsuong suspek didto sa Acenda Pilomena barangay Binabag lungsod sa Bogo niadtong Lunes sa alas 7:00 sa buntag.
Ang biktima mao si Joeriben Lobetania, 32, molupyo sa barangay Bungtod sa Bogo nga usa ka drayber sa traysikol samtang ang suspek mao ang managsuong Bienvenido Niones, 31, ug manghud nga si Bobby Niones, 26, pulos molupyo sa maong lugar.
Matud pa ni SPO4 Emmanuel Masong, imbestigador sa Bogo Police dihang nahinabi sa Banat News sakay sa traysikol ang biktima dihang gibunlot sa mga suspek ug gipalahos ang traysikol. Ang usa ka drayber sa bus nga naagi sa lugar mao nay nagpahibawo sa kapitan sa barangay nga si Aida Mangubat kabahin sa biktimang gitabangan og dunggab ug gikulata daplin sa karsada.
Sa pag-responde sa kapulisan naabtan na taliwala sa katubhan nga gilabay ang patay’ng lawas sa biktima nga naputos sa samad dinunggaban ang kalawasan niini ug wala nay kinabuhi. Si Bobby nasikop ug nasuta nga gipasanginlan ang biktima apil sa nangulat sa mga suspek sa milabay’ng adlaw. - Darrel Carumba (BANAT NEWS)