CEBU, Philippines - Si Gobernador Gwendolyn Garcia gitakdang mohatag og pasidungog ngadto sa mga elemento sa National Bureau of Investigation (NBI) dinhi sa Sugbu ug sa Manila ingon man sa mga kapolisan sa lungsod sa Compostela.
Kini tungod sa malampuson nila nga pagpuhag sa dakong grupo sa mga tulisan nga gitawag nga Flores Gang didto sa usa ka resort sa barangay Estaca, lungsod Compostela niadtong miaging Lunes sa gabii.
Matud pa ni Garcia nga angayan sila nga hatagan og pasidungog ilabina nga nahilakip sa pagpatay ang lider gyud mismo sa maong grupo, ang banggiitang tulisan nga si Alvin Flores.
Bisan pa sa mitumaw nga pagduda nga dili inkwentro ang nahitabo sa pagkamatay sa upat ka mga suspetsadong tulisan, dili kuwestiyon kun giunsa sila pagpatay, apan ang mahinungdanon nga napatay ang maong mga kriminal nga maghatag og risgo sa kinabuhi sa kadaghanan ug labad sa ulo sa mga otoridad, matud pa sa gobernador.
Gipahibawo sa gobernador nga ang iyang buhatan mitakda na og usa ka panihapon uban sa mga opisyales sa NBI ug sa kapolisan sa lungsod sa Compostela, karong semanaha o kaha sa sunod nga semana.
Kini aron personal niyang mahatag ang pasidungog sa kagamhanan sa lalawigan sa Sugbu ngadto sa naasoy nga ahensiya sa gobiyerno tungod sa talagsaon nga kalampusan niini. - BANAT NEWS