CEBU, Philippines - Gihulagway sa kapolisan sa dakbayan sa Lapulapu ug lungsod sa Cordova nga nagmalinawon ang duha ka adlaw nga kasaulogan sa adlaw sa mga Santos ug Kalag niining tuiga.
Matud pa ni Lapulapu City Police Office Director Sr. Supt. Mariano Natu-el Jr. base sa ilang duha ka adlaw nga pagmonitor sa upat ka mga sam-ang sa dakbayan sa Lapulapu walay mga dagkong insidenteng ilang nabantayan.
Matud pa ni Natu-el posibleng gumikan sa ilang subsob nga information campaign sa paghatag og giya sa katawhan kung unsay gidili nga dad-on sa matag sam-ang gamay ra ang ilang mga nakumpiskar nga mahait nga hinagiban ug ilimnong makahubog.
Gawas sa mga sakop sa kapolisan dunay mga tawong ilang gipakatap sa sulod ug gawas sa mga sam-ang nga dako og natabang kini mao ang mga anti-crime volunteers.
Gumikan niini walay natalang kawat sa mga kandila ug kaso sa pagpanguot ug pangilad sulod sa mga sam-ang gumikan sa ilang hugot nga pagmonitor.
Ang Philippine National Red Cross ug Emergency Rescue Unit Foundation nagmontar usab og pwesto alang sa mga dunay gipamati sa kalawasan atol sa ilang pagduaw sa ilang mga kabanay nga mitaliwan.
Usa ka 10-anyos nga bata ang nasunog ang pantalon ug napaso sa paa human masunog sa kandilang iyang natumban apan dali kining narespondehan sa mga sakop sa PNRC.
Samtang sa lungsod sa Cordova, gikalipay usab ni Sr. Insp. Felix Pacaldo ang kahapsay sa duha ka adlaw nga pagpahigayon sa kalagkalag diin walay mga dagkong kaso nga ilang nasigpatan o nadawat gikan sa ilang mga sakop nga gipakatap sa sam-ang katoliko ug municipal cemetery sa lungsod sa Cordova.
Bugtong reklamo nga ilang nakuha mao lamang ang kahuot na gyud sa sam-ang pangpubliko sa maong lungsod hinungdan nga ang kagamhanang lokal sa Cordova pinaagi ni Mayor Adilino Sitoy nagplano kini sa pagtukod og bag-ong municipal cemetery luyo nga bahin sa public cemetery diin adunay gilapdong 12 kapin ka hektarya yuta nga ilang tukuran sa maong proyekto. (Bong Soriano) (BANATNEWS)