CEBU, Philippines - Patay on the spot ang usa ka construction foreman human kini tabangi og dunggab sa iyang duha ka sakop sa barangay Kahumayhumayan dakbayan sa Danao sa milabay’ng gabii.
Ang biktima mao si Cesario Direcho, 47, minyo residente sa sitio City sa barangay Kahumayhumayan dakbayan sa Danao ug usa ka foreman sa usa ka construction firm. Samtang ang gitumbok nga responsable sa maong krimen mao si Marcial Gecain, residente sa Liboron lungsod sa Carmen, ug Juvinal Capote, residente sa Hagnaya lungsod sa Carmen mga sakop sa biktima sa maong construction. Matud pa ni SPO4 Teofilo Deguilmo sa kapolisan sa Danao, base sa imbestigasyon niini nasuta nga gikan nga nag-inom ang biktima ug mga suspetsado ug nagdungan pa og lakaw pauli.
Sa pag-abot sa maong dapit nga giingong hilit ug ngitngit kalit lamang gitabangan og dunggab ang biktima sa iyang mga sakop. Gumikan sa kadaghan sa samad dinunggaban sa kalawasan niini lakip sa dughan namatay diha-diha si Direcho ug wala na kini madala pa sa tambalanan.
Matud pa ni SPO4 Deguilmo inay nga dad-on sa mga residente ang biktima sa tambalanan didto na hinuon kini gidala sa ilang panimalay.
Ang mga suspek dali usab nga nakasibat sa ilang dapit ug hangtod ning pagbalita wala pa masayri sa kapolisan kung unsay motibo sa maong krimen ug padayon ang ilang pagpangita nila ni Gicain ug Capote. (Bong Soriano ug Darrel Carumba) (BANATNEWS)