CEBU, Philippines - Gipasakaan og kaso sa kapolisan sa Presinto 5 sa Opao Police Station sa dakbayan sa Mandaue ang usa ka inahan nga gituohang milawog sa kaugalingon niining anak uban sa mga menor de edad nga babaye ngadto sa mga langyaw nga customer.
Ang gipasakaan og kaso nga kalapasan sa Republic Act 9208 kon kalapasan sa trafficking of person mao si Loreta Collano, 45, minyo, nga taga barangay Paknaan, dakbayan sa Mandaue.
Si Collano nadakpan ni Senior Inspector Alfredo Ortiz Jr., hepe sa Presinto 5 sa gihimo nilang hiniusang entrapment operation uban sa mga sakop sa International Justice Mission.
Didto nila kini masikop sulod sa usa ka hotel nga nahimutang sa dalan A.S. Fortuna sa barangay Banilad, dakbayan sa Mandaue niadtong miaging gabii.
Si SPO1 Reynaldo Urot nga nahinabi sa Banat News miingon nga nadakpan sa akto si Collano sa pagdawat niini sa salapi nga gibayad kaniya gikan sa usa ka Amerikanong customer nga maoy gihimong decoy sa kapolisan sa operasyon nga ilang gipahigayon.
Dugang pa ni SPO1 Urot nga gihimo ang laboratory test batok sa maong dinakpan ug nasuta nga positibo kini sa ultra violet gikan sa salapi nga iyang nadawat nga maoy nagpalig-on sa kaso nga ilang gipasaka batok niini.
Hinuon hugtanong gipanghimakak ni Collano ang maong pasangil sa katarungan nga mikuyog lang siya sa iyang anak nga babaye ug mga menor de edad nga babaye agi og pagsanong sa usa ka pagdapit kanila sa maong langyaw.
Gipasabot niya nga nakighimamat lamang ang maong langyaw ngadto sa iyang anak nga babaye ug mga kuyog niini nga mga batan-on dihang gisikop siya. – BANAT NEWS