CEBU, Philippines - Kompirmado nang modagan si kanhi senador John Henry “Sonny” Osmeña pagkamayor sa siyudad sa Sugbu sa umaabot nga eleksyon.
Ang kanhi senador miingon nga iyang ibalhin karong adlawa ang iyang registration dinhi sa siyudad gikan sa dakbayan sa Toledo human sa iyang pagpakigtagbo sa tigpamaba sa Liberal Party (LP) nga si Butch Abad diha sa Casino Español.
Una nang gipadayag sa kanhi senador nga andam usab siyang makig-uli sa maayong kabubut-on ngadto sa iyang ig-agaw nga si Mayor Tomas Osmeña.
Kini human ipahibawo sa mayor nga dili problema kaniya ang maong lakang kung ang iyang mga kontra sa politika dili na moatake sa South Road Properties (SRP).
Subay niini, ang kanhi senador nisuwat sa kagamhanan sa dakbayan tungod sa iyang tinguha nga magpakisayod labot sa kalamboan sa SRP ug wala hinuon mosupak ang mayor bahin niini.
Gusto sa mayor nga sila si City Administrator Francisco Fernandez ug SRP Manager Nagiel Bañacia maoy mosaysay sa iyang ig-agaw sa kahimtang sa SRP.
Apan nagtuo ang Mayor nga dili makahatag sila si Fernandez ug Bañacia sa kinatibuk-ang detalye sa gustong masayran sa kanhi senador.
Nagtoo usab si mayor Osmeña nga walay laing tuyo ang kanhi senador sa pagpakisayod sa SRP kun dili ang pagpangita og sayop.
Gitataw hinoon sa kanhi senador nga kung siya matagbaw sa himuong eksplinasyon nilang Fernandez ug Bañacia, andam siyang makig-uli sa iyang ig-agaw.
Gani kung magkauli ang maayo nilang kabubut-on gusto niyang usa lang nila ni Bise Mayor Michael Rama ug Georgia Osmeña maoy modagan pagkamayor sa siyudad sa umaabot nga eleksyon.
Gipasigarbo sa kanhi senador nga siya maoy mas taas og kasinatian ug mas takos nga modumala sa siyudad itandi kang Rama apan kun dili moatras si Mike ug Georgia misugyot siyang dunay ipahigayong convention.
Sumala pa niini andam siyang moatras kung dili ituboy sa convention ug paluyohan niya ang mapiling kandidato. (BANATNEWS)