CEBU, Philippines - Misamot na ang kagrabe sa supply sa kuryente dinhi sa Sugbo karong panahona tungod kay kuwang og 200 ka megawatt ang supply sa kuryente matag adlaw sa Cebu Negros ug Panay grid.
Kini maoy gipahibawo ni Jes Alcordo, Presidente sa Cebu Energy Development Corporation (CEDC) kagahapon atol sa 888 News forum didto sa Waterfront Hotel and Casino sa Lahug ning dakbayan sa Sugbu.
Gitumbok nga rason ni Alcordo nga sa pagka karon ang ilang planta sa Toledo nag- operate lamang kini og 66 megawatt ug susama usab sa dakbayan sa Naga.
Matud niya nga ang kakaraan na sa ilang mga planta maoy usa sa hinungdan nga dili na makabuga og kusog nga kuryente .
Gani iyang gitataw nga sa pagka karon ang Cebu dunay kuwang og supply sa kuryente nga mokabat sa 151.3 megawatt matag adlaw.
Si Engineer Raul Lucero sa Visayan Electric Company (VECO) kinsa mitambong usab sa maong forum, mitug-an nga duha na ka tuig hangtud karon nga nakasinati sila og usa ka oras nga rotation brownout nga ilang gibahin sa tulo ka oras sa matag adlaw.
Matud pa ni Lucero ang sitwasyon sa kuryente dinhi sa Sugbu "worsen" nag-anam na og kalisod hinungdan nga wala siya mopasalig kanus-a mahunong ang rotation brownout nga ilang gipatuman.
Hinuon miingon siya nga sa pagka karon adunay siyam ka mga dakong kompaniya sa kuryente nga ila nang gikasabot alang sa dugang supply sa elektrisidad.
Kabahin sa ilang preparasyon para sa Kalag-kalag, miingon si Lucero nga aduna silay mga kawani nga gidistino sa mga dagko ug gagmay’ng menteryohan aron maoy motubag sa problemang masugatan nga trouble sa linya sa kuryente.
Si Alcordo nidugang hinuon nga karung sunod tuig paandaron na ang coal powered plant nga nahimutang sa dakbayan sa Toledo nga makahatag og laing tinubdan sa kuryente. – BANAT NEWS