CEBU, Philippines - Patay ang usa ka gituohang rebelde human kini nakigsinukliay’g bala tali sa mga sakop sa militar kagahapon sa kaadlawon sa sitio Moog barangay Planas sa dakbayan sa Guihulngan, Negros Oriental.
Ang mga sakop sa scout platoon sa 11th Infantry Battalion pinanguluhan ni 1st Lieutenant Danilo Mutoc ug mga kaubanan nagpahigayon og patrolya sa nahisgutang lugar dihang gikasinukliay’g bala ang gibana-banang napulo ka mga rebeldeng New Peoples Army.
Ang engkwentro miresulta sa kamatayon sa usa ka gidudahang rebelde kansang pangalan wala pa mailhi.
Nakuha duol sa patay'ng lawas sa maong lalaki ang usa ka “Baby” Armalite apan wala na diha ang mga kaubanan niini sanglit daling nangikyas ngadto sa kalasangan.
Ang tigpamaba sa Central Command Major Wilson Feria mibutyag nga base sa pasiuna nilang nadawat nga report sa Negros ang mga sibilyang namuyo duol sa gihitaboan mikumpirmar nga dunay daghang mga samaran sa habig sa mga rebelde atol sa ilang pag-ikyas.
Nagtuo ang militar nga posibling lider sa NPA ang napatay tungod sa klase sa armas nga nakuha sa iyang posesyon nga giingong sagad maoy bitbiton sa mga dagko og ranggo sa kalihukan sa NPA.
Ang militar padayon pa sa ilang hot pursuit operation paggukod sa mga rebelde.
Kini na maoy ikaduhang engkwentro tali sa militar ug mga rebeldeng NPA karong buwana. Niadtong milabay'ng semana usa ka taga barangay Banilad ning dakbayan sa Sugbu ang namatay nga giilang si Rodel Carpentero nga gituohang sakop sa NPA nga mirakrak sa checkpoint sa 79th IB sa sitio Pulangyuta sa barangay Mayabona sa lungsod sa Zamboangita sa Negros Oriental.
Nadakpan sa maong engkwentro ang chairperson sa College Editors Guild of the Philippines nga si Maria Carla Alvarico, usa ka registered nurse nga taga dakbayan sa Mandaue; Carlo Cabahug, tinun-an sa University of San Carlos nga taga Mandaue ug Absin Glenn Filamer, tinun-an sa University of Cebu.
Ang mga nadakpan gihimakak nga mga rebelde sa mga kaubang militanteng estudyante sa Sugbu. (BANATNEWS)