CEBU, Philippines - Mipahimangno ang regional director sa Philippine National Police sa katawhan nga iparehistro na ang mga armas nga wala pa narehistro tungod kay walay “exempted” sa maong balaod bisan paman ang grupo sa Alimaong nangangkon duna sila’y kaugalingong gobiyerno.
Nasayran nga si PNP Regional Director Lani O-Nerez mimando sa tanang kapolisan sa nagkalain-laing estasyon ilabi na sa Mandaue nga pahingusgan pa ang kampanya ug information drive kabahin sa amnesty program sa PNP sa mga loose firearms.
Lima ka adlaw nalang mapupos na ang special gun amnesty program sa PNP karong bulana ug human niini mibahad ang kapolisan nga mosugod dayon pagpangronda sa mga tawong gidudahang dunay gihuptang mga armas.
Partikular na niini kadtong kaniadto dunay mga lisensyadong armas apan wala na mo-renew sa lisensya niini pagbalik ug gikunsiderar na sa PNP nga loose-firearm ug kinahanglang sakmiton ug pasakaan og kaso ang tag-iya.
Sa report sa GMA-7 Balitang Bisdak sa milabay'ng adlaw'ng Biyernes ang National Chairman sa Supreme Council sa Datu Alimaong sa syudad sa Mandaue nga si Vicente Gonzales nga may bansag nga “Datu Leon Kilat” nagkanayon nga pwede ra silang dili moparehistro sa ilang mga armas.
Sa rason nga duna silay kaugalingong gobiyerno nga gisunod ug kaugalingong judiciary(hukmanan). Ang Alimaong mao ang pundok sa mga ‘indigenous tribes’ sa nagkadaiyang parte sa nasud. – BANAT NEWS