CEBU, Philippines - Ang Visayas Ombudsman mipahibalong sa sunod semana na nila ipagawas ang findings sa ilang dul-an tulo na ka tuig nga imbestigasyon sa giingong anomaliya sa pagtukod sa kagamhanan sa probinsiya sa Sugbu sa Cebu International Convention Center kon CICC sa dakbayan sa Mandaue.Si Special Graft Investigation Engr. Rodrigo Blazo nagkanayon nga gitun-an pa nila og balik ang nadugang mga ebidensiya human ilang nadawat ang audit report bahin sa CICC sa Commission on Audit.
Matud pa ni Blazo nga may kausaban sila sa ilang findings tungod sa ilang nadiskubrehan diha sa COA findings maong kinahanglan pa nilang tukion pag-usab hinungdan nga malangay ang pagpagawas sa ilang resulta sa imbestigasyon.
Si Blazo miingon nga human unya sa iyang pag-resolve sa maong imbestigasyon, iya pa kining ihatud sa buhatan ni Assistant Ombudsman Virginia Palanca Santiago alang sa dugang pag-review ug pag-aproba sa maong kaso.
Iya hinuong gitataw nga sigurado nang ma-release ang resulta sa imbestigasyon sa Ombudsman labot sa kontrobersiya sa katukuran sa CICC karon nang sunod semana. – BANAT NEWS