CEBU, Philippines - Usa patay ug tulo ang naangol duha niini mga Koreano human gidaro ang ilang gisakyang traysikol sa van niadtong Miyerkules sa hapon diha sa Cebu South Coastal Road sa barangay Lawaan I, dakbayan sa Talisay.
Ang namatay giilang si Arcenia Barela, 54, taga sitio Libo, barangay Mohon sa maong siyudad samtang ang nangaangol mao sila si Patricio Lariosa, 69, drayber sa traysikol ug Jang Yang Jun, 28, ug Kim Jung, 24.
Si SPO4 Henry Obiso, hepe sa Talisay City Traffic Division nga nahinabi sa Banat News nagkanayon nga gikan sa barangay Tabunok paingon unta ngadto sa barangay Pooc ang traysikol.
Pag-abot sa lugar nga nahitaboan giingong wala panumbalinga ni Lariosa ang yellow light ug milahos og tabok sa dalan hinungdan nga kini nadasmagan sa van nga gimaneho ni Herbert Ongcoy, 26 nga taga dalan A.C. Cortes sa dakbayan sa Mandaue.
Si Barela nga nagsakay sa likod nga bahin sa traysikol nalagpot tungod sa ka kusog sa impact ug nabunal sa karsada hinungdan sa iyang kamatayon.
Ang duha ka Korean national ug si Lariosa ang nalandig sa South General Hospital sa dakbayan sa Naga.
Si Obiso nagkanayon nga si Ongcoy kinsa nadetiner karon sa Talisay City detention cell ug si Lariosa ang gikatakdang pasakaan usab og kasong reckless imprudence resulting to multiple physical injuries karong adlawa. - Brenda Batuto (BANAT NEWS)